Созақ ауданында «Әділет» партиясының 2026–2031 жылдарға арналған сайлауалды бағдарламасын түсіндіру және оның негізгі бағыттарын тұрғындар арасында кеңінен насихаттау мақсатында кездесу өтті. Шолаққорған ауылындағы мәдениет сарайында ұйымдастырылған жиынға партияның Түркістан облыстық филиалының төрағасы Алмас Салимов пен облыстық сайлауалды штабтың мүшелері қатысты.
Басқосуда партия өкілдері алдағы бес жылға арналған бағдарламаның негізгі басымдықтарын таныстырып, өңірдің әлеуметтік-экономикалық дамуына бағытталған міндеттерге кеңінен тоқталды. Ұсынылған бастамалар халықтың тұрмыс сапасын жақсартуға, экономиканың тұрақты дамуын қамтамасыз етуге, қоғамдық қауіпсіздікті нығайтуға және тұрғындарды толғандырған өзекті мәселелерді кезең-кезеңімен шешуге бағытталған.
Сайлауалды бағдарламаның маңызды бағыттарының бірі – «Заң мен тәртіп». Бұл бағыт аясында қоғамдық қауіпсіздікті қамтамасыз ету, құқық бұзушылықтардың алдын алу және тұрғындардың құқықтық қорғалу деңгейін арттыру көзделген. Осы мақсатта өңірде 9 мыңнан астам бейнебақылау камерасын орнату, сондай-ақ халықпен тікелей байланыс орнатуға арналған 400-ден астам «Әділет керуені» қабылдауын өткізу жоспарланып отыр. Мұндай шаралар азаматтардың өтініштері мен ұсыныстарын жедел қарауға, тұрғындар мен жауапты мекемелер арасындағы байланысты нығайтуға мүмкіндік береді.
Ал «Тиімді институттар» бағыты мемлекеттік және қоғамдық басқару жүйесінің ашықтығы мен жауапкершілігін арттыруды көздейді. Бұл ретте мәслихат депутаттарының халық алдындағы есептілігін күшейту, қоғамдық қабылдаулар мен есептік кездесулердің санын көбейту міндеттері қамтылған. Партия өкілдерінің айтуынша, тұрғындармен тұрақты байланыс орнату және олардың ұсыныстарын шешім қабылдау барысында ескеру – қоғамдық сенімді қалыптастырудың маңызды тетігі.
Бағдарламаның тағы бір өзекті бағыты – «Қуатты өңірлер». Оның аясында тұрғын үй құрылысын дамыту, инженерлік-коммуналдық инфрақұрылымды жаңғырту және елді мекендердің әлеуметтік жағдайын жақсарту мәселелеріне басымдық берілген. Атап айтқанда, табиғи газбен қамту деңгейін 97 пайызға жеткізу және 2 500 шақырым автомобиль жолын жөндеу жұмыстарына ықпал ету жоспарланып отыр. Бұл бастамалар ауылдар мен қалалардың инфрақұрылымдық әлеуетін арттырып, тұрғындардың күнделікті өміріне қолайлы жағдай қалыптастыруға бағытталған.
«Әділ экономика» бағыты бойынша ауыл шаруашылығын өркендету, шағын және орта бизнесті қолдау, инвестиция тарту және жаңа өндірістік жобаларды жүзеге асыру көзделген. Сонымен қатар кәсіпкерлік бастамаларға қолайлы орта қалыптастыру, өндіріс көлемін ұлғайту және тұрақты жұмыс орындарын ашу арқылы халықтың табысын арттыру міндеттері белгіленген. Бұл бағыттағы жұмыстар өңірдің экономикалық мүмкіндіктерін кеңейтіп, жергілікті кәсіпкерлердің әлеуетін тиімді пайдалануға жол ашады.
Жиында әлеуметтік саланы дамытуға арналған бастамалар да назардан тыс қалған жоқ. Атап айтқанда, цифрландыру үдерісін жеделдету, халықтың әлеуметтік осал топтарын қолдау, білім беру мен денсаулық сақтау қызметтерінің сапасын жақсарту, спорт пен мәдениетті дамыту мәселелері бағдарламада көрініс тапқан. Партия өкілдері бұл салалардағы оң өзгерістер тұрғындардың әл-ауқатына тікелей әсер ететінін атап өтті.
Экологиялық тұрақтылықты қамтамасыз етуге бағытталған «Таза Қазақстан» бағыты да бағдарламаның маңызды құрамдас бөлігі саналады. Бұл бағыт бойынша қоршаған ортаны қорғау, елді мекендердің санитарлық жағдайын жақсарту, жасыл желектер аумағын кеңейту және тұрмыстық қалдықтарды қайта өңдеу мәселелерін жүйелі түрде шешу көзделген. Экологиялық мәдениетті қалыптастыру мен табиғи ресурстарды ұқыпты пайдалану да негізгі міндеттердің қатарында.
Кездесу барысында Алмас Салимов сайлауалды бағдарламаның басты ерекшелігі нақты көрсеткіштер мен нәтижеге бағытталған міндеттердің қамтылуында екенін атап өтті. Оның айтуынша, партияның негізгі мақсаты – тұрғындармен тұрақты байланыс орнатып, олардың талап-тілектерін назарға алу және көтерілген мәселелердің оң шешімін табуына ықпал ету.
«Біз үшін ең басты міндет – халықтың сенімін ақтау. Сайлауалды бағдарламада көрсетілген әрбір бастама тұрғындардың өмір сапасын жақсартуға және өңірдің дамуына қызмет етуі тиіс. Сондықтан халықпен ашық диалог орнатып, елді мекендердегі өзекті мәселелерді анықтау, оларды шешу жолдарын қарастыру және атқарылған жұмыстардың нәтижесін тұрғындар алдында баяндау маңызды», – деді Алмас Салимов.

Жиын соңында партия өкілдері бағдарламада белгіленген міндеттердің орындалуына жүйелі түрде бақылау жүргізіліп, тұрғындармен кері байланыс тұрақты жалғасатынын жеткізді. Өз кезегінде Созақ ауданының тұрғындары ұсынылған бастамалармен танысып, пікірлері мен ұсыныстарын ортаға салды. Қатысушылар партия бағдарламасында қамтылған бағыттардың аудан мен жалпы өңірдің дамуы үшін маңыздылығын атап өтіп, қолдау білдіретіндерін жеткізді.
Айта кетейік, сайлауалды бағдарламаның түпкі мақсаты – елді мекендердің әлеуетін арттыру, әлеуметтік мәселелерді шешуге ықпал ету және әрбір тұрғын үшін қолайлы өмір сүру ортасын қалыптастыру.

