Түркістан қаласында секторлар арасында 9 спорт түрінен ересектер арасындағы қысқы қала біріншілігі басталды. «Балуан Шолақ» атындағы спорт кешенінде өтіп жатқан шарада 8 команда бақ сынасуда. Қатысушылар шахмат, тоғызқұмалақ, волейбол, баскетбол, футбол, үстел теннисі, гір тасын көтеру, қол күрес пен асық атудан жүлделі орындарды сарапқа салмақ.
Тұрғындар арасындағы спортты дамыту мақсатында ұйымдастырылған бәйгенің ашылуында «Amanat» партиясы Түркістан қалалық филиалының атқарушы хатшысы, Түркістан қаласының маслихаты депутаты Ғаппар Амантайұлы және Түркістан қаласы әкімдігінің «Мәдениет, тілдерді дамыту, дене шынықтыру және спорт бөлімінің» басшысы Сәкен Абжаппар сөз алып, спортшыларға сәттілік тіледі.
Айта кетейік, дода кестесіне сәйкес, 30 қараша сағат 18:00-де үстел теннисі, 7 желтоқсан сағат 18:00-де баскетбол,14-ші желтоқсан сағат 18:00-де гір тасын көтеру мен қол күрестен, 21-ші желтоқсан сағат 18:00-де футболдан ойындар өтеді.
Еске сала кетсек,
Абай облысы, Үржар ауданында құсбегіліктен әлем чемпионаты өткен болатын. Оған 6 мемлекеттен, 70-ке тарта саятшылар қатсып, мықтыларын анықтады. Әлемдік додада еліміздің мерейін үстем еткен жерлестерге Түркістан облысының ұлттық спорт жанашырлары спортшыларымен кездесіп, оларға құрмет көрсетті. Соңғы кездері халқымыздың ұлттық спорт түрлері дүниежүзі бойынша қарқынды дамып барады. Әсіресе, Еуропа елдері мен Америка құрама штаттарына дейін ұлтымыздың ұлылығын көрсететін көкпар, жамбы ату және құсбегілік өнер қарыштап өркендеуде. Мамандардың айтуынша, әлемде құсбелгілік ақсүйектердің сүйікті спорты саналады. Осы өнерді жанына серік еткен түркістандық Сейдулла Пан жастар арасында бұл спорттың салтанат құрғанын айтты.
Басқосуда Түркістан облысының көкпар федерациясының вице-президенті Бауыржан Мұсабеков жүлдегер саңлақтарға қаржылай қолдау көрсетті. Ал, облыстық ұлттық спорт түрлері мектебінің директоры, жастардың жанашыры Ғани Ахметбаев әлем, Қазақстан чемпионаттарының жеңімпаздары мен жүлдегерлерін қабылдап, ірі жеңістерге жету үшін аянбай еңбектене беру керек екендігін айтты. Болашақта да бағдарлы жол бар екенін жеткізіп, еліміздің намысы үшін тер төгіп келе жатқан жігіттерге алғыстарын айтты. Айталық, Қарағанды облысы Жаңаарқа ауданында құсбелгіліктен жастар арасында өткен Ел чемпионатында Түркістан облысының таланты Махамбет Намазбай жеңімпаз атанса, Қызылорда қаласында биыл ересектер арасында аяқталған кезекті Қазақстан чемпионатында түркістандықтар Сейдулла Пан алтын медаль, ал Ибрагим Базарбаев қола жүлдені иеленді. Қазір жергілікті жастар арасында ұлттық спорт түрлеріне деген қызығушылық артқанын білікті бапкер Жомарт Кеуенов жақсылыққа балап отыр.
Сонымен қатар, жеңімпаздар бас қосқан жиында түрлі елшілік сайыстарда топ жарған атақты құсбегішілер Дидарбек Аршабай мен Төлемырза Паң, Ерлан Сандыбай мен Бағдат Кеуенов та марапаттан шет қалмады. Осылайша, қасиетті де қастерлі ұлттық спортты жаңғыртып, жаңартып келе жатқан түркістандықтар тамаша көңіл-күймен тарқасты.