Болгарияның Албена қаласында қол күресінен өткен Әлем чемпионатында Шардара ауданының спортшылары толағай табысқа жетті. Жалпы есепте Қазақстан құрамасы жоғары нәтиже көрсетсе, оның ішінде шардаралық спортшылар 19 алтын, 4 күміс және 3 қола медаль иеленіп, әлемдегі ең мықты құрама екенін тағы да дәлелдеді.
Бұл жеңістер – “Шардара Армспорт” спорт клубының жүйелі жұмысының жемісі. Аудан спортшылары тек республикалық емес, халықаралық деңгейдегі жарыстарда да тұрақты түрде жеңіс тұғырынан көрініп келеді. Дүбірлі додада 7 алтынды жасөспірімдер қоржынға салса, 3 спортшы жастар арасындағы бәсекенің бас жүлдесін иемденген. Сондай-ақ, 9 спортшы ересектер арасында қарсылас шақ келтірмесе, 4 сайыпқыран күміспен күптелген.