«Орталықтың «Қадам» білім беру жобасы аясында 137 адам табыс көзін тауып, нәтижеге шықты. Әрине оған жету, қол жеткізу оңай емес. Орталықта бекітілген 11 бағыт бойынша өз кәсібін ашып, табысқа шыққандар саны 98 адамды құрап отыр. Салыстырмалы түрде жақсы көрсеткіш деп ойлаймын. Онда тігін, шаштараз, қолөнер, балалар массажы, тәрбиеші, аспазшы деген мамандықтар қамтылған. Мәселен біздің курсты аяқтап, арнайы сертификат алған түлектер орталықпен арнайы келісімге отырып, серіктес болған қала ішіндегі беделді мейрамханаларда жұмыс істей алады. Осы тұста, айта кететіні, біздің орталық беретін сертификаттар төңірегінде біршама алыпқашпа сөздер бар. Мәселен «орталық сертификаты жарамсыз екен, пайдасы жоқ» деген секілді әлеуметтік желіде шу шықты. Біздің оқыту курстары Түркістан облысы кәсіпкерлер палатасымен бекітілген. Сәйкесінше сертификат тағайындау тікелей солардың құзіретінде. Мәселен біздің курсты аяқтаған әйел міндетті түрде арнайы тесттен өтеді. Оны кәсіпкерлер палатасының арнайы өкілдері алады. Тестен өтпей, сертификат ала алмай қалған аналарды міндетті түрде қайтадан оқытамыз, себебін анықтап, көмекті қайта ұсынамыз. Ал енді олардың алатыны диплом емес сертификат. Яғни белгілі бір кәсіптік саланың арнайы теориялық немесе практикалық сабағынан өткенін растайтын құжат. Сондықтан біз табыстаған құжаттың көмегі оларға көмектеседі. Сондай-ақ орталық стандартты жүйеге бағынбайды. Себебі біз аналардың талап-тілегіне қарай жүйені бағыттап отырамыз. Яғни қатып қалған қағида жоқ. Мәселен орталық көмегіне жүгінетін аналардың көбісі бала тәрбиесімен үйінен шыға алмайтынын анықтап, баласымен бірге келетіндей жағдай жасадық. Одан бөлек, сол аналардың балаларына да арнайы оқу курстарын енгіздік. Мәселен ағылшын тілі, түрік тілі тегін курстары, одан бөлек, мейрамхана ісі бойынша арнайы сабақтар қойдық. Түптеп келгенде осының барлығы аналар сұранысының нәтижесінде іске асуда. Дәл сол секілді оқыту курстарында 3 айға создырдық. Себебі бір айлық курсты оқып, бітірген ана толық сол саланы игеріп кетуі қиындап, кедергі келтірді. Ақылдаса келе 3 айға созып, оқыту курсын бекіттік. Басқа орталықтардың қалай жұмыс істейтінін білмеймін, біздің орталық қазір сұраныс негізінде, стандарттық жүйеге бағынбай жұмыс істейді. Бұл меніңше өте тиімді жоспар» — дейді Жібек Әшірханова.
Орталықтағы «Қадам» білім беру жобасы аясында 8 үміткер мемлекеттік қайтарымсыз грант иегері атанып, қазіргі таңда, жоба бойынша білім алып шыққан 17 ананы жұмыспен қамтыған. «Атамекен» Түркістан кәсіпкерлер палатасының ұйымдастыруымен «Қазақстанның үздік тауарлары» өңірлік көрме байқауында орталық «Үздік әлеуметтік жоба» номинациясын иеленген. Осы бағытта орталықтың екі грант иегері үздіктердің қатарында болған. Жібек Әшірханованың айтуынша әлеуметтік саланы басқару оңай жұмыс емес. Алайда өзінің бұл бағытқа төтеннен келе салмағанын айтады.
«Байқағаныңыздай, біз «Қамқорлық жанұя» орталығымыз. Бастапқыда тек қамқорлық болды, кейіннен «жанұя» деген сөзді қостырдық. Ондағы мақсат, орталық тек анаға емес тұтас жанұяға көмек көрсете алса деймін. Қазір сол жоспарым жүзеге асты. Орталық тек әйелге ғана емес, оның балаларына да бағыт бере алады. Бұл онсызда қиналып жүрген ана үшін үлкен демеу. Себебі ондай қиындықтан өзім өткенмін. Сондықтан орталыққа жүгінген әйелдердің түпкі мәселесі неде екенін түсініп тұрамын. Негізі өзім осы Түркістанның қызымын. Атырауға келін атандым. Жолдасым дүниеден өткен соң, екі баламды көтеріп, қоғамның талабына қарай бейімделуге күш салдым. Әлеуметтік салаға кеше ғана келген адам емеспін, 30 жылдан бері қызмет етіп келемін. Бүгінде «әлеуметтік сала өкілі» деген арнайы статус бар. Ал мен келген жылы ондай құрмет жоқ болатын. Қоғамға, әлеуметке тегін қызмет етіп, пайдалы болуды көздедік. Бүгінде соның нәтижесін көріп отырмыз. Президент Қасым-Жомарт Тоқаевтың осы салаға көңіл бөліп, ерекше статус бергені өте құптарлық іс. Себебі біздің негізгі қозғалысымыз, қоғамға пайдалы болуды көздегеннен бастап жемісін бере бастайды. Сондықтан Түркістандағы «Қамқорлық жанұя орталығы» әрі қарай нәтиже үшін жұмыс істеп, әлеуметтік аз қамтылған отбасылардың өмір сүру сапасын жақсарту және қиын жағдайларын еңсеруде ынтасын арттыру мен қаржылық жағдайын түзеуге себепші бола беретініне сенімдімін» — дейді «Қамқорлық жанұя» орталығының басшысы Жібек Әшірханова.
Қорыта айтқанда, әлеуметтік осал топ өкілдерінің бақытты ғұмыр кешуіне түрлі жағдайлар жасалуда. Әлеуметтік, медициналық қолдау жұмыстары да тоқтаған емес. Жоғарыда айтылған қамқорлық орталығы көрсететін қызметтер де осының бір парасы десек болады. Сондықтан қай кезеңде болмасын, өз жұмысына шын ықыласпен кірісетін әлеуметтік қызметкерлер еңбегін ерекше атап өтуге болады. Олар үшін өзгенің проблемасы деген түсінік жоқ, қиналған адам көрсе қолұшын созып, қолынан келген көмегін көрсетеді. Әлеуметтік қызметкерлердің осы сала-да тұрақтап қалуы да осы қасиеттерін-де. Бұл жерде адамның діні, нәсілі, ұлты, жасы, білім деңгейі немесе қо-ғамдағы мәртебесі маңызды емес. Тек қана кең жүректі, адами бейнесі айқын, өзінен гөрі өзгелер болсын дейтін адамның ғана қолынан келері анық.